ՕՐՎԱ ԽՈՍՔ

23.10.2020 / Որովհետև մարմնավոր լինողները մարմնի բաներն են մտածում, իսկ հոգևոր լինողները` հոգու բաները: Որովհետև մարմնի խորհուրդը մահ է, և Հոգու խորհուրդը` կյանք ու խաղաղություն: Մարմնի խորհուրդը Աստծո դեմ թշնամություն է, որովհետև Աստծո օրենքին չի հնազանդվում և կարող էլ չէ:Հռոմեացիներին 8.5-9

Մարմնի խորհուրդը մահ է: Եկեք լուրջ վերաբերվենք Աստծո խոսքին: Ադամը լուրջ չէր ընդունում “մահ” հասկացությունը. նա չէր պատկերացնում, թե ինչ տեղի կունենար արգելված պտուղն ուտելուց հետո: Եվ, ինչպես տեսնում ենք, նրա մարմնավոր մտածելակերպի արդյունքում մահն աշխարհ եկավ:
Սիրելի’ս, մարմնավոր մտածելակերպը քեզ մահվան կտանի: Միգուցե մտածես. “Բոլորն էլ մեռնելու են”: Այո’, բայց կա նաև հոգևոր մահ. դու կարող ես զրկվել հավիտենական կյանքից և Աստծո արքայությունից: Ժամանակն է, որ այս կարճ կյանքում մտածես նաև հոգուդ փրկության մասին:
Մենք պետք է նորոգենք մեր մտածելակերպը, հոգու աչքերով նայենք մեր շուրջը, չապստամբենք, չքննադատենք և չքննարկենք ուրիշների արարքները: Ոմանք կենտրոնանում են ինչ-որ մեկի վրա և անընդհատ քննադատում:
Մի’ բամբասիր ոչ մեկին: Երբ խոսում ես, սկսի’ր քեզնից և վերջացրո’ւ քեզնով: Խոնա’րհ եղիր: Եզնիկ Կողբացին ասում էր, որ եթե նույնիսկ հրեշտակների ձայնը լսես, մեծ գործեր անես, բայց խոնարհություն չունենաս, ամեն բան սուտ է:
Քննենք՝ օրվա մեջ որքան ենք կարդում Աստծո Խոսքը, խորհում հոգևոր բաների շուրջ և որքան ենք մտածում, խոսում մարմնավոր բաների մասին: Գրված է, որ մարմնի խորհուրդը Աստծո դեմ թշնամություն է, որովհետև Աստծո օրենքին չի հնազանդվում և չի էլ կարող:
Հոգու խորհուրդը` կյանք է ու խաղաղություն: Եկեք մեր մտածելակերպը հնազանդեցնենք Աստծո օրենքին: Թող Աստծո Խոսքը լինի մեր կյանքի հիմքը: Մտածենք Հիսուսի նման: Ամե’ն: